ثغرات قانون الايجار الجديد

ثغرتين في عقد الإيجار الجديد، خد بالك منهم كويس.. 

=============

♦️(1)- لو حضرتك عن المؤجر، فحاول تكتب العبارة دي في العقد : يكون الوفاء بالأجرة في موطن المؤجر. ليه ؟ عشان خلو العقد من العبارة دي، معناه إن الوفاء بالأجرة هيكون في موطن المستأجر (الفقرة الثانية من المادة 586 من التقنين المدني )، يعني المؤجر هو اللي هيسعى للمستأجر عشان يتحصل على أجرته.

وبالتالي لو رفعت دعوى فسخ استنادًا على الشرط الفاسخ الصريح، هيدفع المستأجر بأنك لم تسع لموطنه لتحصيل الأجرة، وبالتالي هتكون أنت كمؤجر السبب في عدم تنفيذ المستأجر التزامه، وبالتالي هيعطل إعمال الشرط الفاسخ الصريح، والمحكمة هتطبق سلطتها التقديرية في الفسخ، أو بعبارة تانية هتتمسك بإعمال قواعد الفسخ القضائي، بمعنى تاني لو نفذ التزامه وعرض الأجرة كاملة قبل صدور حكم نهائي، العقد مش هيُفسخ.

♦️(2)- لو حضرتك عن المستأجر ، فتأكد من صياغة مدة العقد وتكون واضحة ومحددة، لأنك لو كتبت إن مدة العقد ثلاث سنوات قابلة للتجديد "لمدد أخرى"، فده معناه إن بعد 3 سنين العقد هيتجدد العقد للمدة المحددة لدفع الأجرة مش 3 سنين يعني لو بتدفع شهريا هيتجدد العقد شهر بشهر، فلازم تكتب قابلة للتجديد " لمدة أخرى مماثلة "، ده معناه إنه هيتجدد مرة أخرى 3 سنوات.

🔵ملحوظة رقم (1) : لو كتبنا إن مدة العقد " مشاهرة " أو " مشاهرة طوال حياة المستأجر " أو " الإيجار ينتهى بوفاة المستأجر " أو " مستمرة دون الرجوع للمؤجر " أو " مفتوحة ".. دي كلها معناها إن مدة العقد هي مدة دفع الأجرة.

🔵ملحوظة رقم (2) : في بعض المحامين بيصيغوا المدة بعبارات واضحة ومحددة، بالشكل اللي أوضحناه، لكن بيضيفوا بعدها العبارة دي " ما لم ينبه الطرف الثاني (المستأجر) بإنهاء العقد " أو " وللمستأجر وحده الحق في طلب إنهائه " أو " ولا يجوز للمؤجر إنهاء الإيجار إلا بموافقة المستأجر " اعتقادًا منه إنه بيحمي المستأجر من المؤجر، لكن في الحقيقة العبارات دي هتفسد مدة العقد، وهنرجع تاني لنقطة الصفر، وهيتجدد العقد للمدة المحددة لدفع الأجرة.